MENIŇ   ASLYÝETIM

Men   atamda   zehin  ýokdy   üýtgeşik,

ýöne   öz   kärini   ýürekden   söýdi.

Gaş   bilen   diwalaň  goşuny   goşup,

Kümüşdir   gyzylyň   nikasyn   gyýdy.

Ussahanasynda —sungat   öýünde,

Meniň   eziz   atam   edensoň   yhlas,

Gerçekleň   gözüne   gözel   göründi

Türkmeniň  edaly   gözelleri   has.

Gupbalary   şazadalaň  täji  deý

Gözelleriň   mertebesin   göterdi.

Şahyr   diňe   gözelligi   wasp  etse,

Atam   gözelligiň   üstün  ýetirdi.

Atamyň   sarpasyn   saklady   millet,

Olam   il  sarpasyn   saklady  geldi.

Bir  elinde  haýyr,  birinde  sungat,

Şeýdip  ol   Şatlygyň  şahyry   boldy.

Meň  kakamda  zehin  ýokdy  üýtgeşik,

Hünär   däl,   borjuny   ýürekden   söýdýa.

Duşman   geleninde  ençe  ýurt  aşyp,

Ol  öz   takdyryny   mizana   goýdy.

Atamyň   Şatlykdan   başlanan   ýoly,

Ony   gazap   bedewine   atardy.

Oň  ýeňişli   başlan  gazaply  ýoly.

Baryp   Mauthauzende   gutardy.

Hemme bilýär bendelikde dert  uly,

Ol şol ýerde bir ýylyny ötürdi,

Bendelikde on görkezen  mertligi,

Türkmen gerçegine şöhrt getirdi.

Kakam saglyk bilen gowuşdy bize,

Bar   hesreti   bilen   öýüne   geldi.

Bir  elinde haýir,  birinde  naýza,

Ol  şeýdip, hesretiň  şahyry   boldy.

Men olardan daşa zyňylan daş däl —

Süňňümde ganlaryn göterip geldim.

Men bu gün Şatlygyň ýurdundan başlap,

Gözellik  ýurdunyň  şahyry  boldum.

Günäkärn men däl beýle wakanyň,

Özümi şu wakaň şaýady öýdýän.

Hesretin  wasp edýän diri  kakamyň,

Ýok  atamyň Şatlygyny wasp edýän.