AÝ ÝAŞDY, AGYLY GALDY

Neneñ oñat mart gijesi,

Ýyldyzly asman gülläpdir.

Çykypdyr ýazyñ bijesi,

Ýokarda Aý agyllapdyr!

Ertir güneş çykar çeni,

Günortanlar bolar maýyl.

Sag-aman gyşyñ geçeni

Boldy indi aýyl-saýyl.

Adamlaryñ ýüzi ýagty,

Susdan henek atyşýan kän.

Ýazyñ çykar-çykar wagty

Obañ içi akan-dökän.

Bu gün goñşy öýe ylgan

Buşlukçynyñ buşlugy nagt.

Aý däl-de gökde agyllan,

Tüýnüklerden görünýär bagt.

Ýöne yzgytsyz ses edýär

Güýçlenip ýeli gaýranyñ.

Gara bulut Aýdan gädýär,

Dişlän dek çetinden nanyñ.

Ah, ýürekde bu gijeden

Düşnüksiz agyry galdy.

Bakýan dörtburç penjireden,

Aý ýaşdy, agyly galdy.