Gezendelik rysgalyna bil baglap,

Öz ýurdumyñ syrlaryny açaryn.

Köne galalaryñ deñinde aglap,

Täzelerniñ deñesinden geçerin.

Çoh-çoh täsinlikler duşar bu ýolda,

Gözleriñ doýmaz hiç seredip-bakyp,

Eñegine tüý bitmedik ýaş molla

Azana gygyrýar minbere çykyp.

Metjitler gurulýar, kerwensaraýlar,

Bejerilýär gadym topragyñ derdi.

Daşyñ aldygyça köşkler hem jaýlar,

Tanamak kyn ýöne bu gadym ýurdy.

Wagt geçýär ömürleñ üstünden ätläp,

Her kese ezizdir ýaşan zamany.

Biri gussa batsa, geçmişin ýatlap,

Sen ondan gözleme ýaramaz many.

Ýöne gam şerabyn datsa takwalar,

Ýöne ýerde ýatsa, biri büdrese,

Ýalan söz üstünde tagt gursa şalar,

Kime derkar metjit bilen medrese?

Elbetde, gutulmak kyn bu elemden,

Gün ýaşyp, zemine çökse ikindi.

Aldaw bilen alnan meniñ elimden,

Ömrümiñ öwezin kim dolar indi?

Ne geljegi söýýän, ne-de geçmişi,

Dünýäñ düýbi näme: şermi ýa haýyr?

Arman, muny çözüp bilmez hiç kişi,

Seret, ölümem syr, ýaşaýyşam syr!