OL GÜN GELER!

Sen gam çekme, bagda bahary sowlan,

Gyş añzagy geçer, ýene ýaz geler.

Şonda meñ ýerime başga bir oglan,

Şonda señ ýeriñe başga gyz geler!

Ýumruklar gowşamaz erk üçin düwlen.

Belent maksat ýola ýalkymyn salar.

Şonda meñ ýerime başga bir oglan,

Şonda señ ýeriñe başga gyz geler!

Bu baglar gözel bor zor-sütem sowlan,

Uly-kiçi hemmäñ ýüzleri güler.

Şonda meñ ýerime başga bir oglan,

Şonda señ ýeriñe başga gyz geler!

Bu ýolda ýitsek biz, etmegin arman,

Seýrelen hatarlar täzeden dolar.

Çünki meñ ýerime ýene bir oglan,

Çünki señ ýeriñe ýene gyz geler!

Nätjek, biz ikimiz kyn döwür doglan,

Ýöne geljek ýyllar bagtly bolar.

Şonda meñ ýerime bagtly oglan,

Şonda señ ýeriñe bagtly gyz geler!