MEN SENIÑ GAŞYÑA  ATLY BARAMOK!

Men seniñ gaşyña atly baramok,

Ýogsam, bu ýörişe çen boldy eýýäm.

Bagtdyr siziñ köçäñizden ýöremek,

Siziñ köçäñizi mukaddes saýýan!

Elbetde, gyzlaryñ gözel hemmesem,

Gülküsi ünjüsiz, ýörişi seýkin.

Men welin, birsalym seni görmesem,

Nämüçindir, eýýäm bozulýar keýpim.

Meñ hyýalym atly barmak gaşyña.

Şondan pes hormaty rowa göremok.

Ýöne welin, entek men şu ýaşyma

Duşuşyga atly barýan göremok!

Ýogsam, men-ä barsam at münüp bärden,

Ýüzin salyp, saçyp mañlaýdan derim.

Senem: ”Ile meñzeş bol!” diýseñ birden,

Ýeri, men näderin? Şonda näderin?