TÜNÜÑ ÝARY

Tünüñ ýary diýme gijä,

Aý gökden bakyp geçmese.

Ýagtylyk nireden bolsun

Gözleriñ şöhle saçmasa?

”Eý” gör gaýta bu gijäni,

Ikimizi duşurypdyr.

Bag içine garañkyny

Garga kimin üýşüripdir.

Sowuk şemal öwsübersin,

Gutarýança oñ möhleti.

Meni ot dek ýylatmazmy,

Eýse gözleriñ şöhlesi?

Ikiçäk biz, ýar, bu ýerde,

Hoşlaşyp gitme alñasap.

Gije ýaman göze perde,

Adam görmez añsat-añsat!

Ýagtylyk ýeriñ özünde,

Aý şöhle saçsa-saçmasa.

Tündür günortanyñ ýary

Söýgüliñ gujak açmasa!

Garañky diýme bu gijä,

Aý gaşyn kakyp geçmese.

Ýagtylyk nireden bolsun

Gözleriñ şöhle saçmasa?!