Bir jam suw ber, gözelim!

Geçip barýan teşne men.

Diñle sazym, gazalym,

Men bir jahankeşde men.

Gel, görküñi göreýin,

Uzat suwly jamyñy.

Sen suw ber, men bereýin

Saña şirin janymy!

Yşk meni oda saldy,

Gel, sen ýanyma golaý.

Ýolda usurgap galdy

Meni kowlan tüweleý.

Gezende atly esger,

Kän söweşde boldum men.

Gyljym kütelse eger,

Ýow gyljyna çaldym men.

Düldüle taýdyr atym,

Ýüpekdir onuñ ýaly.

Söweşlerde küýsedim

Seniñ kimin bir ýary.

Sözüm soñlanyp barýar,

Uzat sen suwly jamy.

Bir eliñe suw al, ýar,

Bir eliñe bukjañy!