AKMYRAT ŞIRIÑ ÖLÜMINE
Neçün adam bir gün dünýäden gidýär,
Gaýratyna mätäç ilini goýup?
Ýaşamaly wagty dyzyny epmän,
Ýanyp, bişip, köýüp...
Neçün adam bir gün dünýäden gidýär,
Dost-ýarynyñ ýüregine gan öýüp:
Ýañy topragyna kökün uranda,
Ýañy ugranynda ýapragny ýaýyp?
Neçün adam bir gün dünýäden gidýär,
Gidýär perişde deý gözlerden gaýyp?
Nädip beýle hata işi edýär ol
Dostlarnyñ ýüregni demirden saýyp?
Neçün adam bir gün dünýäden gidýär?
Meger, beýle sorag bermegem aýyp.
Gözüñe görünmän gezýän awçydan
Pelekden kim sorar: ”Nämüçin?” diýip?
Neçün adam bir gün dünýäden gidýär?
Aýtsañyzlañ, bilýän barmy, halaýyk?
...Ah, dost, öt günämi, iñ bolmanda, heý,
Galyp bilmediñmi bolup sen maýyp?..