GAZ UÇDY, GARGA GONDY!
Kyblagähim, Watanym,
Saña diýjek sözüm bar.
Ýaşasam-da goýnuñda,
Boldum bu gün saña zar.
Ýekirlende señ diliñ,
Çykmadymmy howandar?
Mertebesin öz iliñ
Goramasañ niçik bor?
Garaşsyzlyk isledim
Men saña, ata mekan.
Eýsem, muny ýürekden
Küýsemedik barmykan?
Geçdi gitdi ol günler,
Kim ýük boldy, kim ýükçi.
Toý gutardy. Çar ýandan
Üýşdi soñra tüýdükçi!
Suw getiren kimsedi,
Kimse-de küýze döwen.
Suwy başyna çekdi
Küýze döwenler bu gün.
Märekede danalañ
Orny boldy çet indi.
Haýp kimler öñe düşdi!
Kimler gyra çekildi!
Kimleñ çyrasy ýandy,
Kimleñ çyrasy söndi.
Bu sonarly meýdandan
Gaz uçdy, garga gondy!