kaýda-dyr?                                 « قايدا دئر؟»

Niçe ýylap ah o fyrak çekerim, jan kaýda-dyr?

Seru – senuber,tut – çynarym, bag o bostan kaýda-dyr?

Tige hanjary , bagry sanjar, afete jan kaýda-dyr?

Beske waspyn eýlenen çoh, jennet  mekan kaýda-dyr?

      Hane – malym , kyldy weýran, şol gülüstan kaýda-dyr?

                                       ****

Bu ýalançy bäş gün ömüre fany dünýä neýlesin?

Sobho – şamlar, jeň o dawa ganly dünýä neýlesin?

Pul o mal we hyrs o az-dyr many dünýä neýlesin?

Garb we şargy ölçüp alýanyň sany dünýä neýlesin?

Mal we dünýä, ol ary satan kaýda-dyr?

                                    ****

Bir topary kyldy hyjran bu pelek , köp agladyp,

Bir toparyny kyldy geda , el – aýagyny bagladyp.

Bir toparyny kyldy feda, Ene bagryny dagladyp,

Bir topary hakgy eda etdiler, jan taladyp,

Bu bäş günlik nefsi üçin  watan satan kaýda-dyr?

                                    ****

Kaýda galdyň eý watanym, Gürgen we daşte o sähra?

Bu gün kerwen gelip ýetdi, aýry bir menzel sara,

Bu menzelde ýok kararym, ger ýetsem ol sara,

Aýralyk ody salandyr, kalbyma ýüz müň ýara,

Türkmen halkyň ,Türkmen asly, Türkmenistan kaýda-dyr?

                                    ****

Ýüňkelen bu ýagdaýym, geň durmuşym, teňdir delim,

Hazan urup bostanyma, saralyp soldy gülüm,

Bu ýalançy fany dünýä, baglady bu el – golum,

Tirerim güle el uzadyp, ýete bilmezden elim,

Köýmüşem bu derd – elimden, meý o mestan kaýdadyr?

                                      ****

Söýgi many tapdy watan, beski hyjran eýledip,

Gara tümlik aýra saldy, jany weýran eýledip,

Dogan – ýaran, dost – gardaşy tar- maran eýledip,

Ganym gabap halka gurdy, säher we reýgan eýledip,

Mar çakan dek çaşdy bu gün, ýar o dustan kaýda-dyr?

                                    ****

Waspyňa mest olmuşam, aşyk kemin didara zar,

Gyfalta! Gal okudan, ol jennetiň bidara zar,

Agyr gün başdan geçirseň,  şonda sen timara zar,

Gel bu gün ganat ýaýyp gitsem berun, huşýara zar,

Durna deý uçsam ýerimden, ol dehistana kaýda-dyr?


Aşkabad 1996. Hangeldi Ownuk

.


نيچه يئللاپ آه و فراق چـکريم، جــا ن قـايدا دئــر؟

سرو و صنوبر، توت – چنارئم باغ و بستان قـايدادئــر؟

تيغ ِ خنجر، باغـری سانجار، آفت ِ جــان قايدادئــر؟

بسکه وصفئن ايله نن چـوخ، جنّت مکان قـايـدادئـر ؟

خانه – مالئم قئلدی ويران شول گلستان قايدادئر؟

***

بو يالانچئ بأش گـون عـمر فـانی دنيا نيله سـين ؟

صبح و شام لار جنگ و دعـوا غانلئ دنيا نيله سين ؟

پول و مال و حرص و آز دئر معـنیّ ِ دنيـا نيله سين؟

غرب و شرقئ اؤلچـوپ آليانئنگ سانئ دنيا نيله سين ؟

مال و دنيا، حـرص اوچين ا ُل عاری ساتان قايدادئر؟

***

بـير توپاری قئلدی هجـران بو فلک کوپ آغلادئپ،

بـير توپارنئ قئلدئ گدا ال – آياغنـئ باغلادئپ،

بـير توپارنئ قئلدئ فـدا انه باغـرئنئ داغلادئپ،

بـير توپارئ حقّئ اداء اتديلر جـان تالادئپ،  

بـو بأش گونليک نفسـی اوچـين وطن ساتان قايدادئر؟

***

قايدا قالدئنگ ای مکانئـم گرگـن و دشت و صـحـرا ؟

بو گون کـرون گليپ يتـدی آيـری بير منـزل سـرا،

بو منـزل ده يـوق قرارئم گِـر  يتمِسم  ا ُل ســرا،

آيرالئق اوُدئ سالانـدئر قلبئمـا يـوزمونگ يـارا،

ترکمن خلقئنگ ترکمن اصـلئ ترکمنـستان قايدا دئر؟

***

يؤنگکه لِن بو ياغدايئم گِنگ  دورموشئم  تنگ دير دليم،

خزان اوروپ بـُستانئما ، سارالئپ سولـدئ گوليـم،

 بو يالانچئ فانـی دنيـا ، باغـلادئ بو ال – قُولئم ،

تـيرارئم گول ال اوزادئپ، يتـه بيلمـزدن الـيم ،

کؤيـميشم بـو درد – الِمـدن، مـی و مـستان قايدادئر؟

***

سؤيگی معنی تاپدئ وطن، بسـکه هـجران ايله ديـپ،

غارا تومليک آيرا سـالدئ جـانئ ويـران ايله ديـپ ،

دوغان – ياران ، دوست _ غارداشئ تار و ماران ايله ديپ،

غنـئم غاباپ خلقه غوردی ، سحر و ريگان ايله  ديـپ،

مار چاقـان دک چاشدئ بو گون ، يار و دوسـتان قايدادئر؟

***

وصفئنگا مست اُولمئشـام ، عاشق کمين ديدارا زار،

غفلـتا ! غال اوقـئدان، ا ُل جنّـتينگ بيـدارا زار،

آغئر گون باشـدان گچيرسنگ، شوندا سن تيمـارا زار،

گِل بوگون غانات يايئپ گيتسم برون، هـوشيارا زار،

دورنا دی اوچـسام يريمـدن، ا ُل دهـستان قايدادئـر؟

***

            عشق آباد – ۱۹۹۶- خـانگلـدی  اونق