Sözle dostum! Ne iş düşdi başyňa,
Aýlanaýyn gara nerkes gözüňden!
Gapyl erdi, gülüň geldi gaşyňa,
Aýlanaýyn gara nerkes gözüňden!
Kişiniň agasy şeýle bolarmy,
Gözün oýup, çaý.düýbüne salarmy,
Kyýamatyň webalyna galarmy,
Aýlanaýyn gara nerkes gözüňden!
Bu ne gaýgy, bu ne hesret, janlarym,
Bu ne apat, bu ne mähnet, janlarym,
Ýagşylyga bu ne töhmet, janlarym,
Aýlanaýyn, gara nerkes gözüňden!
Ýarym bile meni çaýa salyňlar,
Ýarym üçin meniň janym alyňlar,
Gözüm oýup, ýar gözüne goýuňlar,
Aýlanaýyn, gara nerkes gözüňden!
Hüýrlukga diýer, ýandym oduňa,
Ýanyp, eda boldum ýaryň derdine,
Dostlar galyp, duşman gitsin ýurduna,
Men aýlansam gara nerkes gözüňden.