Dynmaý säher perýat etsem;
Tapar menmi balam seni?
Ýyrtyp ýakamy çäk etsem,
Taparmenmi, balam seni?
Ybraýym dek oda girsem,
Ysmaýyl dek gurban bolsam,
Dawut dek kyrk ogul bersem,
Taparmenmi, balam seni?
Daşgyn derýa dek gaýnasam,
Mansur dek darda oýnasam,
Kaknus kimin ot çeýnesem,
Taparmenmi, balam seni?
Bary-ýogyň boldy güman,
Maňa boldy ahyrzaman,
Terk eýlesem bu hanyman,
Taparmenmi, balam seni?
Adym Hysrow, boldum garyp,
Galdym gamyňda sargaryp,
Ýagty jahany agtaryp,
Taparmenmi, balam seni?