Mürçe gözelleri şahandaz bolar,
Aşyklar ýanynda paýendaz bolar,
Bir ýerik kän barsaň, gadryň az bolar,
Garry gadyrdany salma gözüňden.
Daýnanyň öňüniň beýik arçasy,
Dökülse dökülsin gülüň gunçasy,
Owarram ýykylsa garry Mürçesi,
Garry gadyrdany salma gözüňden.
Köp ýaşadym diýip, çekmegin arman,
Gara saçyň bolsam agyna gurban,
Çem gelen döwrany goluňdan bermän,
Garry gadyrdany salma gözüňden.
Kemine diýr, geplemesem-de gep bolar,
Geplemesem, haýsy derdim dep bolar?
Ýalançyda ýagşy-ýaman köp bolar,
Garry gadyrdany salma gözünden.
Dostlar, bir gözeliň waspyn söýlär men,
Meşhur bolsun sözi sözler içinde;
Okar men, ýazar men, dessan eýlär men,
Bipa bolsun ak kagyzlar içinde.
Seniň dek ter gunça baglarda bitmez,
Uzatsam almaga, gollarym etmez,
Uklasam, oýansam, ýadymdan gitmez,
Meger, mesgen tutmuş gözler içinde.
Şiriniň hemrasy, Leýliniň taýy,
Şöhläňden gizlener asmanyň aýy,
Her gije, her gündiz gördügim saýy,
Ýüzüň aýa meňzär ýüzler içinde.
Kemine diýr, wysal içre gezmäge,
Ylym gerek seniň waspyň düz.mäge,
Yşk oduna galam titrär ýazmaga,
Dilim sözde, köňlüm közler içinde.