SAG ELIMDE TUGUŇ, SOLUMDA TARLAŇ
Bu gije düşmüşem jennet bagyna,
Sag elimde tugun, solumda tarlaň.
Bagban olup, ikisiniň bagyna,
Bir elimde tuguň, birinde tarlaň.
Ikisi gül kimin, bir-birden gunça,
Ýüzleri almadyr, billeri inçe,
Leblerin emeýin imdi doýynça,
Bir elimde tuguň, birinde tarlaň.
On bir ýyldyr çekdim jebri — jepany,
Asly handan gördüm mahri-wepany,
Sizler birle sürdüm zowky-sapany,
Bir ýanymda tuguň, birinde tarlaň.
Birisi hüýrdir, birisi peri,
Sarygüldir kyrk gyz içre serweri,
Asly handyr meniň gözümiň nury,
Sag elimde tuguň, solumda tarlaň.
Kerem diýer, gyzyl gülüň gunçasy,
Rugsat bolsa, guçam biliň inçesi,
Synalar aklygy — peýnir külçesi,
Bir ýanymda tuguň, birinde tarlaň.