Ylym atam, şirin tilli ussadym,
Habar bergil, söwer ýarym kaýdadyr?
Arşdan aşdy meniň nala-perýadym,
Şu çekdigim ahy-zarym kaýdadyr?
Jan alar gamzasy, näzik şiwesi.
Ýany bar getirmiş alma, heýwesi,
Dilaram bagynyň dürli miwesi,
Eňňurym, injirim, narym kaýdadyr?..
Aşyk olam jan biýr magşuk ýerine,
Ne külpetler gelmiş Mejnun serine,
Dersimiz ýetişdi Gül depderine,
Täze ter bakjaly barym kaýdadyr?
Şu müşgil işlerim, gel, küşat eýle,
Senden galsyn bu, bir ýagşy at eýle,
Ýa-da öldür meni, ýa azat eýle,
Ýa habar ber: zülpi tarym kaýdadyr?
Terk eýläp yşkyda bu täji-tahtym,
Men çykmyşam baglap esbaby-rahtyn.
Şat gezsem açylgaý bu gara bahtym,
Men bilmenem namys-arym kaýdadyr?
Aşyklaryň budur ýoly-ýodasy,
Ýar ýolunda jan bermekdir kadasy,
Perizat ählinii asylzadasy,
Laglu-göwher, zer nigärim kaýdadyr?
Ustadym, aýryldym başda tilimden,
Aýralyk ajydyr, belki, ölümden,
Men Bilbilem, aýra düşdüm Gülümden,
Derdim bilen gamgüsarym kaýdadyr?
|