JYLAW, Agyzdyrygyn, kellekiniň ýa-da nogtanyň iki tarapyna berkidilen gaýyş bag. Näme, olaryň jylawyny silkip, sen bulary atdyr öýdýärmiň, bular it ahyry  (A. Gowşudow, Köpetdagyň eteginde). Çekilýän jylaw Meleguşuň altyn boýnuny ýaý ýaly egýärdi Kerbabaew, Aýgytly ädim).

JYLAWLAMAK,   1. Jylaw  geýdirmek, jylaw salmak.

2. Jylawyny tutup saklamak. Gürzelek çal sakgalyň kimdigini täze hyzmatkär bilmese-de, onuň haýbatyndan sussy basylyp, derrew ýabysyny jylawlady (B. Kerbabaew, Aýgytly ädim). 3. göç. m.   Boýun egdirmek, tabyn etmek. Birini jylawlamak.

JYLAWLANMAK, 1. Jylaw geýdirilmek, jylaw salynmak.

2. Jylawy tutulyp saklanmak, togtadylmak?

3. göç. m. Boýun egdirilmek, tabyn edilmek. Bütin front boýunça derýanyň akymy jylawlandy (Sowet edebiýat žurnaly).

JYLAWLATMAK, 1. Jylaw saldyrmak, geýdirtmek.

2. Jylawyndan tutduryp saklatmak.

3. göç m. Boýun egdirtmek, tabyn etdirmek.

JYLAWLAŞMAK, Jylawlamaga kömekleşmek.Atlary jylawlaşmak.

JYLAWLY, 1. Jylaw geýdirilen, jylaw salnan. Jylawly at.

2. göç. m. Boýun egdirilen, tabyn edilen.