ISTEREM
Eý byradarlar, hudadan lutfy-yhsan isterem,
Hastaýy-zaram weli, derdimge derman isterem,
Bilbili-bihanaman, bagy-gülüstan isterem,
Göwherli-lagly-zümmeret tapgaly kän isterem.
Bu bozulmyş köňlümin tagtyga soltan isterem.
Serwi boýlym bolmasa, gül berki ragnany neteý,
Istegim Leýlidir, özge kaddy zybany neteý,
Aşyky-zaram hakyky, maly-dünýäni neteý,
Andan aýry sünbüli-reýhany, zybany neteý,
Ger miýesser bolsa ýarym, birge döwran isterem.
Sakyýa-wahdet elinden içmişem jamy-şerap,
Çaykdym ol sähraýa, oldum içre mesti-harap,
Maksadym-görsem nigarymnyň jamalyn bir garap,
Ýüz-ýüze düşgeç, tutaşyp, boldy bu bagrym kebap.
Bezmi-waslyda anyn okyrga destan isterem.
Bar idý köňlüumde kim bir inçe esrary-nahan,
Äşgere eýledim syrym aldyna eý şahy-jahan!
Arzyny diýr düşbü Mejnun, ha ýagşydyr ha ýaman,
Eşit arzymny meniň, eý gamgüsarym Leýli jan,
Çekmişem hijran jepasyn wasly-janan isterem.