Gel, köňül, ýara gideli,
Hemra bolsaň, ýör biläni,
Ýar ýoluna gadam goýsaň,
Paý ornuna ser biläni.
Ýaman bilen ýoldaş bolma,
Duşman bilen syrdaş bolma,
Tagamda tabakdaş bolma,
Uflis, haramhor biläni.
Asmanyň görki enwerdir,
Dünýä görki simu-zerdir,
Jeset-toprak, jan-jöwherdir,
Alyp bolmaz zer biläni.
Iliňden gitseň awara,
Şonda bolar sen biçäre,
Goňşy bolsaň haramhora,
Sütem eýlär zor biläni.
Bahyl baýda berim bolmaz,
Merdiň sözün bawar kylmaz.
Arwananyň ýüki galmaz,
Ýola girseň ner biläni.
Guwanmagyl sypatyna,
Müner sen gahar atyna,
Duş bolsaň ýaman hatyna,
Ömrün öter şer biläni.
Magtymguly, ýakyn-ýatlar,
Hany ol gadyrdan atlar?
Dünýe gelen barça zatlar,
Ýegsan bolar ýer biläni.