Leýli bilen Mejnun ötdi dünýäden,
Olardan at galdy, menden galmady.
Şirin diýip, Perhat ötdi dünýäden,
Olardan at galdy, menden galmady,
Her kimsäniň yşkyn etdi zyýada,
Ýar-ýar diýip, näler gezdi dünýäde,
Ýusup hem Züleýha etdi uyrada,
Olardan at galdy, mendein galmady.
Keşt edip jahany, dünýäni gezip,
Seýpelmelek ýördi deňizde ýüzüp,
Medhalyn tapmady, umydyn üzüp,
Olardan at galdy, menden galmady.
Kimseler muhupbet şerabyn içdi,
Ýar üçin baş goýup, bir ýola düşdi,
Şirin diýip, Perhat düňýeden geçdi,
Olardan at galdy, menden galmady.
Gül bilen Nowruz hem derýada akyp,
Hijr oduna jany-jismini ýakyp,
Ýetdiler myrada, derýadan çykyp,
Olardan at galdy, menden galmady.
Bir niçe aşyklar ýar üçin öldi,
Bir niçeler keňül söýenin aldy,
Her kimiň özüne laýyk at galdy,
Hemmeden at galdy, menden galmaday.
Sizler Garyp hem Şasenem bolar siz,
Bu dünýädn göterip galar siz,
Araňyzda Gülnahaly neýlär siz,
Sizlerden at galdy, menden galmady.