Köňlüm guşy ganat baglap,
Uçsam diýip, arzuw eýlär,
Tylla käse guýup şerap,
Içsem diýip arzuw eýlär.
Bilbil köňli hoş gülünden,
Jomart köňli çag ilinden,
Näzli ýaryň ol bilinden,
Guçsam diýip, arzuw eýlär...
Galar gyzlar köňül çaglap,
Mydam aglar, ýürek daglap,
Däli köňül ganat baglap,
Uçsam diýip, arzuw eýlär.
Mundan barsam Hindistana,
Gözüm tutsam Dagystana,
Şähri-Bulgar, Rumustana
Aşsam diýip, arzuw eýlär.
Men münsem Mejnun dagyna.
Girsem Eremiň bagyna,
Näzli ýaryň gujagyna
Duşsem diýip, arzuw eýlär.
Joşsam dostlar men umýuan dek,
Dünýäni tutsam duman dek,
Hepes diýer, ol taban dek
Ýaşsam diýip, arzuw eýlär.