Toty tekellim bir peri,
Sözlär şeker zary bilen.
Şunkar guşum bent eýlemiş,
Her zülpüniň tary bilen.
Müşkün saçyn eýläp dügün,
Halymny eýläpdir zebun,
Razy men, öldürse bu gün.
Goýnundaky nary bilen.
Bäh-bäh, ajaýyp simi-ten!
Oldur meni mejnun eden.
Aklykda bäs eýlär beden,
Kyrk çilläniň gary bilen.
Gähi nahal dek çyrmaşyp,
Kä öpüşip, kä guçuşyp,
Mollanepes diýr, ýantaşyp,
Oltursa öz ýary bilen.