Nägehan gezerdim güli-gülşende,
Gülgün ýaňaklaryň ýadyma düşdi;
Alma enaryňa gözüm düşende,
Alma ýaňaklaryň ýadyma düşdi.
Hijr elinden çekdim pygany-nala,
Elip dek kamatym ogşady dala,
Arzuw eýläp, ýetebilmen wysala, ,
Aýralyk, çaglaryň ýadyma düşdi.
Ýüzleriň şemygdyr, syýa käkiller,
Saçlaryň manendi mary-sünbüller,
Çemenler baglandy, jemyg oldy güller,
Başdan aýaklaryň ýadyma duşdi.
Seniň hesretiňden sargaryp soldum,
Jebri-tygyň bilen bagrymy dildim,
Ýüz müň arman bilen senden aýryldym,
Ol gezen jaýlarym ýadyma düşdi.
Nepes diýr, bagrym daglar içinde,
Bezm eýlesem ak otaglar içinde,
Badam kemal tapmyş baglar içinde,
Badam gabaklaryň ýadyma düşdi.