PEÝMANYŇ
Ýetir bu salamym biwepa ýara,
Hany biziň bilen ähdi-peýmanyň?
Hiç rehmiň gelmeýip, Mejnuny-zara,
Hany biziň bile ähdi-peýmanyň?
Bir täze ot saldyň Mejnun janyma,
Ahyr galdyň bu garypnyň ganyna,
Taňla arz edermen magşar hanyna,
Hany biziň bilen ähdi-peýmanyň?
Gyzyl gül açylyp, bu gün solandyr,
Bildim,ýarym, ykraryň hem ýalandyr,
Gara gözlim, nirde köňlüň galandyr?
Hany biziň bilen ähdi-peýmanyň?
Bu ne işdir Mejnun diri ýörende,
Şerm etmezmiň deň-duşuňy göreňde,
Agzymdan ot çykar, her ah uramda,
Hany biziň bilen ähdi-peýmanyň?
Mejnunam eýlerem allaga zary,
Sen bilersen halym ýa biribary!
Leýlim unutmyşdyr, geldi habary,
Hany bizin, bilen ähdwt peýmanyň?