Goç ýigitler, sürüň munda döwrany,
Ençeme jenanyň geçen ýerleri,
Şaapbasyň gyzy Şasenem jany,
Garyp guluň alyp, guçan ýerleri.
Ak göwsüne tylla düwmeler düzen,
Sallanyban aşygyna göz süzen,
Bir ajap sapaly baglarda gezen
Bilbil ýaly dürler seçen ýerleri.
Sermest ýakalarda seýran etdirip,
At çapdyryp, altyn gabak atdyryp,
Çadyr gurup, ak öýleri tutduryp,
Gülüp oýnam, göwün açan ýerleri.
Zelili diýr, Halap, Şirwana bardym,
Aşyk Aýdyň pirin gaşynda durdum,
Haňlap ýatan' köşgi-eýwan kän gördüm, .
Gör, kimleriň taşlap göçen ýerleri.