Kysmat olmaz, gidem uzak ýollara,
Nesip goýmaz, gider ýolum baglar heý,
Haýran, Mejnun bolup çykdym çöllere,
Baryp mesgen tutam sizi, daglar, heý!
Oýun bile oglanlygyň deminden,
Geçdim-geldim kämilligiň çeminden,
öňlüm lerzan boldy dunýä gamyndan,
Tutdy synam çapraz-çapraz daglar, heý !
Gaýda-gaýda oglanlygyň raýyndan,
Ýetip geldim kämilligiň paýyndan,
Batdy başym, çyka bilmen laýyndan
Ýada düşer öňki gezen çaglar, heý!
Jahyllykda çar tarapa atyşan,
Bilmezlikde ham işlere gatyşan,
Ejiz galyp, garrylyga ýetişen,—
Dert edinip, öz-özünden aglar, heý!
Magny aňlan Magtymgulyň sözünden,
Pikre düşer, gan ýaş akar gözünden,
Hemme zatlar tagýyr tapar özünden,
Ýa reb, ýykylmazmy beýik daglar, heý!