Mesgana ýörgenden gaýry ýurtlarda?
Oýnap-ösen öz ýurduňdan aýrylma.
Melul käkilik deý nebsiň ugrunda,
Dama duşup, ganatyňdan aýrylma.
Namartlaryň köňli şalykny istir,
Namartlaryň köňli duşmana doý diýr,
Bigadyrlar ýalan sözlere rast diýr,
Gadryň bilen ülpetiňden aýrylma.
Namartlar hem muhannesler — naçarlar,
Tagamyň iýr, işiň bolsa gaçarlar.
Dogry ýoldan egri ýola geçerler,
Tälim beren ustadyňdan aýrylma.
Kimse namart bolsa, kimi mert bolar,
Ýagşy iş et, senden ýagşy at galar.
Herne gelse başa, tiliňden geler,
Magtymguly halk çagyndan aýrylma.