Bir käkilik, aldyrsa körpe balasye,
Saýraý-saýraý, yzlamaýan bolarmy?
Bir bilbil ýitirse gyzyl lälesin,
Hasratyndan sözlemeýen bolarmy?
Kürresi elinden gitse eşegiň,
Telmirip tört ýana gözlär uşagyn,
Akmaýa aldyrsa elden köşegin,
Bagryn bozup bozlamaýan bolarmy?
Bala sesin diňläp, asyp gulagyn,
Döke-döke göz ýaşynyň bulagyn,
Ak jeren aldyrsa elden owlagyn,
Mäleý-mäleý gözlemeýen bolarmy?
Agsagyň elinden alsaň agajyn,
Ýaman derde düşer, tapmaz alajyn,
Bir güýçli duşmana duşsa mekejin,
Jojugyny gözlemeýen bolarmy?
Aýralyga adam ogly neýlesin?
Kim galar, görmeýen ajal hilesin?
Magtymguly haýwan bilse balasyn,
Ynsan bagryn duzlamaýan bolarmy?