Oýunyň lezzetin bilmeýen adam,
Hünärli ýigidiň sazyna degmezz
Bet syýakly, bethüý bolan pis adam,
Perizadyň eden näzine degmez.
Bimagnynyň sözi jaýyňdan öter,
Gybat edip, özi günäge batar,
Ýamanyň zyýany iline ýeter,
Nadanyň peýdasy özüne degmez.
Adam bardyr, ony şalar çagyrdar,
Adam bar, zulm edip, garyp agyrdar,
Adam bardyr, körpe ýanyn agyrdar,
Adam bardyr, şal-kiz ýanyna degmez.
Muhannesiň bolmaz namysy, aňy,
Bir söweş gününde eýlemez jeňi,
Aga-begler, muhannesiň on müňi,
Mert-ähliniň alty ýüzüne degmez.
Magtymguly, döwran soňudyr adam,
Lahat atly öýge goýar sen gadam.
Many söz aňlamaz, biakyl adam,
Danalaryň aýdan sözüne degmez.