Dilber, görgeç aldyň akly-huşumny,
Düzülmiş ýüzüňde hal iki ýandan;
Yşkyň söwdasyna saldyn başymny,
Damar dodagyndan bal iki ýandan.
Gül açylar, şeýda bilbil mest bolar,
Aşyk, magşuk merhemine dost bolar,
Agaç barly bolsa, başy pes bolar,
Meniň iltimasym al iki ýandan.
Ikimiz seýr edip gireý bu baga,
Özüň çekme gözellerden gyraga,
Goýalyň leb-lebe, dodak-dodaga,
Tomaşaňa gelsin il iki ýandan.
Ikimiz gideli ýol bilen bile,
Bilbil arman çeker açylan güle,
Seniň yşkyň meni saldy bu hala,
Elip kaddym bolmuş dal iki ýandan.
Ysmaýyl çöllerde haky ýat eder,
Joşup yşk oduga ygtykat eder,
Garyp göwnüm degse meni şat eder,
Götersin zülpleriň ýol iki ýandan.