Synasy röwşendir, göwsi jöwherden,
Lebi lagyl, sadap dişleri dürden,
Jan algyjy jellat gözi hanjardan,
Endamyna nur çaýylan, perizat.
Aşyga ot salar kereşme, näzi,
Dertlý gula derman bilbil owazy,
Kä açar sen gamdan jennetiň ýazy,
Kä ýylgyryp, bagrym dilen perizat.
Ölüm bolmaz aby-haýat içene,
Lebiň sorup, inçe bilden guçana,
Toba kyldym derzaýyňy biçene,
Nusga bolup, dünýä gelen, perizat.
Bir göreni köýdir nurdan alkymy,
Yşka ataş salar ýüznüň ýalkymy,
Ýaňagy bal-şerbet, üzüm salkymy,
Derde dowa-däri bolan, perizat.
Ismiň üç harp: üç «lam», bir «elip», dört «käp»
Han enar sypatly, husnuň mahy-tap,
Aşyky diýr, boldum yşkyňda kebap,
Jellat gözli, janym alan, perizat.