Patyşahym, saňa arzym sözläýin,
Zöhre gyzyň haýran boldy köşgünde.
Tahyr gelmiş, bu gün kimden gizläýin,
Hyrydaryn gözi gördi köşgünde.
Ýary bilen söhbet tutup Zöhre jan,
Rakyplar mekrinden isteýip aman,
Surnaý çalyp, nagra kakyp şadyýan,
Dokuz gündür döwran sürdi köşgünde.
Bagynda jem bolmuş bir bölek peri,
Söwdügine roýmal atar her biri,
Tahyr—Zöhre jany, Zöhre—Tahyry,
Alma bilen atyp urdy köşgünde.
Bagban diýer, Zöhre jani görsün diýp,
Iki aşyk zowky-sapa sürsün diýp,
Halaýyga toý-tomaşa bersin diýp,
Sizden habar sorap durdy köşgünde.