|
Husny mün tümen bahaly,
Dilberim dildarym geldi!
Sormaga gelmiş bu haly,
Gam defgy, gamhorym geldi.
Lebinden nygmat saçyla,
Mähriban bolup açyla,
Sünbül bäs etmez saç ile,
Jan riştesi tarym geldi,
Goý bäri destin almaly,
Biz üçin ýany almaly,
Ak ýüzi goşa almaly,
Alma bilen narym geldi.
Ýol degse, zülpün dagydyr,
Synamda yşkyň dagydyr,
Ýetmez men ýaryn dagydyr,
Gözel wepadarym geldi.
Guwandym rengi-alyna,
Aldandym mekri-alyna,
Golun daldalap alyna,
Zülpleri şamarym geldi.
Jilwesi älem narydyr,
Eltafy bizden narydyr,
Elinde alma-narydyr,
Gözleri hunhorym geldi.
Jemaly älem ýarydyr,
Her zülpi älem ýarydyr,
Gören diýr: «Kimin ýarydyr?»
Ol pasly baharym geldi.
Ak ýüzünde nukta haly,
Tahyryň geçer ne haly,
Sormaga gelmez bu haly,
Saky gül ruhsarym geldi.
| |
|