Göçe-göç eýledi göwün kerweni,
Gel, Öwezim, dolanalyň daglara.
Kadyr möwlam gaýdyp berdi gaşyma,
Gel, Öwezim, dolanalyň daglara.
Garrydy, garrydy, göwün garrydy,
Goja dagda gar galmaýyn eridi,
Çandybile agyr kerwen ýöridi,
Sür, Öwezim, dolanalyň daglara.
Goja dagyn, synasynda gary bar,
Jülgesinde injiri bar, nary bar,
Elmydama baglarynyň bary bar,
Bas, Öwezim, dolanalyň daglara.
Görogly aýdar: haraýlarym çatyldy,
Goç kelleler şalgam kimin atyldy,
Targy gulak dal bedewler tutuldy,
Mün, Öwezim, dolanalyň daglara.