BEÝAN EÝLÄÝIN
Mahym jan, arzymny beýan eýläýin,
Bir göwheri-şamçyragdan aýryldym.
Bagy-meýdan içre saýran eýläýin,
Ýar ýurdunda şähr-otagdan aýryldym.
Bahar bolsa, gyzyl güller açylar,
Müşki-anbar çar tarapa saçylar,
Meýhanada gülgün şerap içiler,
Meý mest olup gezen çagdan aýryldym.
Çarwalary sähralarda gezerler,
Gyz gelin garyşyp, nagma düzerler,
Ýigitleri alma-nardan üzerler,
Eňňurly, injirli bagdan aýryldym.
Daglaryna çöker ebri-syýalar,
Jülgesinde gögär dürli giýalar,
Kepderi ýaýlagy, belent Gaýalar,
Tarlaň mesgen tutan dagdan aýryldym,
Tahyr diýr, sygyndym piri-ussada,
Rakybyň elinden gelmişem dada,
Meýlisi muhupbet, golunda bada —
Piýalalar sunan sagdan aýryldym.