Her saba gezeýdim güli-gülşende,
Baglar arasynda boldum eserli;
Müşki-tatar moýlym, meýna gerdenlii,
Söwdügim, elinden boldum eserli.
Müşki-anbar moýlaryna düzülmiş,
Humarlanyp ala gözler süzülmiş,
Asal, şeker leblerinde ezilmiş,
Zülpi zerefşanly, müşki, anbarly.
Munakgaş öýlerde, ak otaglarda,
Bilbil pygan eder soly-saglarda,
Düwürjik-düwürjik derler al ýaňaglarda
Dür, göwher düzülmiş, çüw ýüzi derli.
Ne sebäpden güldeý meňzim sargara,
Hesretiňden bagrym başy müň para,
Iki mämäň meňzär ol goşa nara,
Alma zenehdanly, ýüzi gülerli.
Gökde bulut oýnar, derýada mahy,
Seni gören aşyk köp çeker ahy,
Hemra bir dilenji, sen jahan şahy,
Seniň dek görmedim bir semi-zerli.