Hyýalyn köňlümniň öýüne doldy,
Tawus tomagalym, sona Selbinýaz;
Tygy müjgänleriň bagrym dildi,
Keşti-kär eýlediň jana, Selbinýaz.
Mejlisiňde al şeraplar içiler,
Gülüp baksaň, könül bendi açylar,
Bu älemge müşki-anbar saçylar,
Degende zülpüňe şana, Selbinýaz.
Gel, ýarama melhem eýle, han peri,
Açylypdyr bagyň müşki-anbary,
Söwdügim, men seni görenden bäri,
Gelmişem imana, dine Selbinýaz.
Daglaryn jereni awçylar awlar,
Bilbilli, çemenli bostanly baglar,
Gözeller çaýpanyp zülpüni ýaglar,
Ak ýüze hal düşer, däne, Selbinýaz.
Tomaşaňa geler gyzlaryň hany,
Eger çyn aşyk sen, magşugyn tany,
Eýrany, Turany, bu şirin jany,
Hemra, gurban eýlär saňa, Selbinýaa.