Boýuň serwi diýsem, kamatyň — tuby,
Ak ýüzünde hallar hindidir-hindi;
Gözeller içiniň huby-mahbuby,
Seniň gözelligiň indidir-indi.
Iki gaşyň meňzetmişem helala.
Ýarym seni görüp, düşdüm bu hala,
Lebleriň şekerdir, agzyň pyýala,
Içmeli çaglarym indidir-indi.
Näzlim, bu janyma jebr etme beter,
Müjgäniň hanjardyr, janymdan öter,
Senden bu gözellik bir güni öter,
Guçmaly çaglaryň indidir-indi.
Yşkyňdan ugradym tükenmez derde,
Arzuwyň çeker men, şamu-säherde.
Aşyk Hemra diýer goşlup bir ýerde,
Uçmaly çaglaryň indidir-indi.