Bir salatyn boýlym, serwim senewber,
Leblerinde şirin, şeker, bal olsun;
Jemalyň kuýaşdyr, kamatyň ar-ar,
Çemenler içinde boýuň dal olsun.
Sürmeler çekilmiş ol gara göze,
Dostum, ýaşyn, ýetsin, elbetde, ýüze,
Men neýledim, sonam, ne diýdim size?
Bir galat söz diýdim, tilim lal olsun.
Ýüzüni meňzetdim aýa-kuýaşa,
Seniň bilen döwran sürsem hemişe,
Asmanda melekler eýläp tomaşa,
Wenehdan degresi goşa hal olsun.
Seniň geýdijegin atlaz daraýy,
Jaýyň jennet bolsun köşki-saraýy,
Hemra diýer, aýagynda dupaýy,
Ýaşyl köwüş, altyn, kümüş, lagl olsun.