Bir doga eýläňiz uluslar, iller,
Meniň ahym ýara ýetişermikän?
Magrupdan-Maşryga ýeten erenler,
Aşyk magşugyna ýetişermikän?
Bize hümmet bersin ol uly pirler,
Olaryň hökminde zire-zeberler,
Bir ah ursam ýanar ýedi gat ýerler,
Köňlüm yşk oduna tutaşarmykan?
Tomaşaňa geler agalar, begler,
Sürmeli gözleriň meni çoh eglär,
Ýerinden aýrylan garyp käkiller,
Ýene kah-kah urup, gülüşermikän?
Meniň köňlüm gussa bilen gamlarda,
Ýar ýardan aýrylyp, gezer her ýerde,
Iki peri hemdem bolup bir ýerde,
Bir-biriniň gadryn bilişermikän?.
Bizden aşnalygy ýat olan Selbi,
Bizi gamda goýup, şat olan Selbi,
Owwaldan Hemraga adalan Selbi,
Ýatlar -bilen oýnap, gülüşermikän?